Maður einn frá Kosta Ríka er í ákæru frá Lögreglustjóranum á höfuðborgarsvæðinu sakaður um að hafa stolið viskíflösku af tegundinni Ballantine´s Finest úr verslun ÁTVR í Austurstræti. Flaskan kostar 6.599 krónur. Ekki hefur tekist að birta manninum ákæruna og er hún því birt í Lögbirtingablaðinu samkvæmt venju. Maðurinn er kallaður fyrir Héraðsdóm en málið verður tekið fyrir 12. ágúst næstkomandi.

Í fyrirkallinu segir: „Ákærði er kvaddur til að koma fyrir dóm, hlýða á ákæru, halda uppi vörnum og sæta dómi. Sæki ákærði ekki þing má hann búast við því að fjarvist hans verði metin til jafns við það að hann viðurkenni að hafa framið brot það sem hann er ákærður fyrir og dómur verði lagður að honum fjarstöddum.“

Þess er krafist að maðurinn verði dæmdur til refsingar og til greiðslu alls sakarkostnaðar.

ÁTVR gerir einkaréttarkröfu á manninn þess efnis að hann greiði henni andvirði viskíflöskunnar, 6.599 krónur. Auk þess krefst ÁTRV dráttarvaxta og lögmannskostnaður. Viskíflaskan gæti því orðið manninum nokkuð dýr þegar upp er staðið.