Borgarstjórinn í Reykjavík, Dagur B. Eggertsson, kallaði í morgun saman neyðarstjórn Reykjavíkurborgar. Ástæðan er hópsýking Covid-19 á höfuðborgarsvæðinu sem greindist nýverið. Dagur segir frá þessu í færslu á facebook síðu sinni.
Dagur segir þetta í samræmi við viðbragðsáætlanir borgarinnar. Þetta undirstrikar að taka þarf þá þróun sem birst hefur í fréttum undanfarið alvarlega þótt hópsýking þurfi í sjálfu sér ekki að koma á óvart.
– Upplýsingum verður miðlað til starfsfólks og starfsstaða borgarinnar í dag þar sem minnt er á almennar einstaklingsbundnar smitvarnir og aðra aðgát, svo sem aukin þrif.
– Sérstakar leiðbeiningar og spurningalistar hafa verið útbúnir vegna starfsfólks sem er að koma til vinnu erlendis frá, þannig að hægt sé að meta hvenær því er óhætt að mæta til vinnu.
– Neyðarstjórn velferðarsviðs hefur einnig verið kölluð saman á þessum morgni og mun yfirfara og herða reglur um heimsóknir á öldrunarstofnanir og ef til vill aðrar aðgerðir til að vernda til viðkvæmra hópa. Þetta verður nánar tilkynnt um leið og það liggur fyrir.
Til upprifjunar þá eru almannavarnir ekki lengur á neyðarstigi – en við erum á hættustigi. Þetta þýðir að Reykjavíkurborg og yfirstjórn borgarinnar heldur stöðugt vöku sinni yfir ástandinu og metur það á hverjum tíma og grípur til þeirra aðgerða í samráði við almannavarnir, sóttvarnarlækni og á vettvangi neyðarstjórnar borgarinnar.