Fólk sem er í sóttkví vegna COVID-19 mun geta greitt atkvæði í forsetakosningunum í dag. Þetta kemur fram í tilkynningu frá dómsmálaráðuneytinu.

Umræddir einstaklingar munu geta kosið í Hlíðasmára 1 í Kópavogi á bílaplani sunnan megin við húsið. Sýslumaðurinn á höfuðborgarsvæðinu mun sjá um kosninguna. Unnt verður að greiða atkvæði milli kl. 15 og 18:30.

Atkvæðagreiðslan mun ekki fara fram með hefðbundnu sniði, en fólk mun þurfa að keyra á bíl inn í tjald þar sem að þeir munu skrifa á blað nafn þess frambjóðanda sem þeir vilja kjósa.

„Atkvæðagreiðslan verður með þeim hætti að kjósandi kemur einn í bifreið sinni og keyrir inn í tjald sem verður á staðnum. Óheimilt er vegna sóttvarna að opna hurð eða glugga á bifreiðinni eða fara út úr henni. Séu tveir kjósendur, sem eru í sömu sóttkví, saman í bíl verður að vera hátt skilrúm á milli svo kjósandi greiði atkvæði án þess að nokkur sjái. Ekki mega fleiri en tveir saman í bíl og eingöngu tveir í þeim tilvikum þegar kjósandi getur ekki ekið sjálfur.

Kjósendur skulu hafa með sér eftirfarandi:

Skilríki til að sanna á sér deili

Blað þar sem kennitala kjósanda hefur verið skrifuð með stórum læsilegum tölustöfum

Blað og penna þar sem kjósandi skrifar nafn þess sem hann vill kjósa og gera þannig kjörstjóra sem veitir kjósanda aðstoð við atkvæðagreiðsluna grein fyrir hvernig hann vill kjósa.“

Líkt og áður kemur fram geta þessir einstaklingar kosið á milli kl. 15 og 18:30. Kjósendur eru beðnir um að hafa í huga að atkvæðagreiðslan mun taka nokkurn tíma.