Til stendur að hafa samstöðusamkomu á Austurvelli klukkan 16:30 á miðvikudaginn vegna máls George Floyd, svartur maður sem lést eftir afskipti lögreglunnar í Minneapolis í Bandaríkjunum. Málið hefur vakið mikla reiði í Bandaríkjunum, sem og víðar í heiminum, og þykir sýna skýrt að líf svartra einstaklinga í Bandaríkjunum skiptir lögreglu minna máli en líf hvítra. George var grunaður um að hafa reynt að greiða fyrir vörur í verslun með fölsuðum peningaseðli, brot sem felur ekki í sér valdbeitingu eða ofbeldi, og því sætir furðu að lögregla hafi gengið fram með slíku offorsi að það leiddi til mannsláts.
Málið hefur vakið mikla athygli hér á Íslandi og nú hefur verið boðað til samstöðufundar á Facebook. Þar segir:
„Í samstöðu við svarta bræður okkar og systur í Bandaríkjunum ætlum við að koma saman á Austurvelli til að mótmæla kerfi sem byggir á yfirburði hvítra og ítrekað myrðir svart fólk. Það er mikilvægt að stuðningsmenn sýni stuðning í verki á þessum tíma til að vernda svart fólk, tryggja öruggt rými fyrir alla og veita svörtum röddum að heyrast. Jeffrey Guarino og Asantwea Feaster stýra viðburðinum. Samkoman mun hefjast á því að upp verða lesin nöfn þeirra svörtu einstaklinga sem hafa verið myrtir af lögreglumönnum, síðan verður sjö mínútna þögn því það var sá tími sem það tók að myrða George Floyd. Það verða ræðumenn sem munu ræða um hugmyndafræðina um yfirburði hvítra, kerfisbundna notkun á lögreglu til að undiroka svarta og hvernig þú getur nýtt forréttindi þín sem hvítur einstaklingur til að vernda svarta einstaklinga. Samkomunni mun ljúka á hugvekju frá Asantwea Feaster
Við biðjum um að þú komir með andlitsgrímu og virðir tveggja metra reglu þar sem þú getur. Ef fjöldi mættra fer yfir 200 einstaklinga þá biðjum við stuðningsmenn að fara yfir götuna til að fækka fjöldanum á Austurvelli, þú getur sýnt stuðning og samt gætt að öryggi þínu og annara“
[Blaðamaður þýddi úr ensku]
Síðu viðburðarins má finna hér
Andlát George Floyd náðist á nokkur myndbönd þar sem agndofa vegfarendur tóku upp síma sína til að mynda athæfi lögreglu. Heyra má á myndböndum að sjónarvottar biðja lögreglu ítrekað að sleppa af honum takinu og benda lögreglumönnum á að að George geti ekki andað. Lögreglumaðurinn sem bar ábyrgð á dauða George hefur verið handtekinn fyrir verknaðinn. Víða er nú mótmælt í Bandaríkjunum og hafa miklar óeirðir átt sér stað. Algjört útgöngubann er nú í gildi í Minneapolis og hefur þjóðvarnarlið verið virkjað í 26 fylkjum Bandaríkjanna.