Eldur kviknaði í rútu sem merkt er Arctic Adventure í Bláskógabyggð um kl. 13 í dag. Rútunni var lagt í vegkant og var kerra fyrir flúðasiglingabáta fest aftan í hana.
Vegfarandi, sem sendi DV myndir frá atvikinu, segir að skyndilega hafi komið upp mikill reykur og eldur í kjölfarið. Brann rútan til kaldra kola. Slökkvilið kom á vettvang um hálftvöleytið og slökkti í glóðum sem enn loguðu.
Rútan var mannlaus er eldurinn kom upp. Telur vegfarandinn að hún hafi verið á leið að bátahúsinu Drumbó er hún bilaði og hafi hún þá verið yfirgefin.
Ekki náðist í Arctic Adventures við vinnslu fréttarinnar né lögregluna á Suðurlandi.
