Eins og fram hefur komið í fjölmiðlum í dag hyggjast Danir opna landamæri sín fyrir Íslendingum og Þjóðverjum þann 15. júní næstkomandi.

Samkvæmt frétt DR fylgir þó böggull skammrifi því skilyrði fyrir því að komast inn í landið er að hafa bókað minnst sex gistinætur utan Kaupmannahafnar og geta sýnt fram á það við komuna til landsins.

Kaupmannahöfn er sá staður í landinu þar sem flestir eru smitaðir og því vilja yfirvöld reyna að beina ferðamönnum annað.

Íslendingar létta af hömlum þann 15. júní einnig. Landið hefur ekki verið lokað hingað til en tveggja vikna sóttkví er kvöð sem hefur legið á komufólki, en verður aflétt. Þess í stað verður boðið upp á skimun á Keflavíkurflugvelli eða framvísun á heilbrigðisvottorði á staðnum. Fyrirkomulagið er enn í mótun og því ekki vitað hvort aðrar kvaðir munu fylgja komu til landsins.