Líklegt er að Íslensk erfðagreining verði beðin um að koma inn í skimunarverkefnið sem á að hefjast á Keflavíkurflugvelli þann 15. júní þegar ferðamönnum verður aftur gefinn kostur á því að koma til landsins án þess að fara í tveggja vikna sóttkví, með því að fara í skimun fyrir kórónuveirunni á Keflavíkurflugvelli eða framvísa heilbrigðisvottorði.
Þetta kom fram í Kastljósi á RÚV í kvöld þar sem rætt var við Svandísi Svavarsdóttur heilbrigðisráðherra.
Verkefnisstjórn sem heilbrigðisráðhera skipaði til að undirbúa framkvæmd sýnatöku og greiningar á COVID-19 meðal farþega sem koma til landsins skilaði skýrslu með niðurstöðum sínum í gær. Frá þessu er greint á vef Stjórnarráðs.
Meðal niðurstaðna eru þær að afkastageta veirufræðideildar Landspítalans sé aðeins 500 sýni á dag. Það þykir mjög lítið þó að enn sé óvíst um hve mikill ferðamannastraumurinn verði í byrjun. Svandís sagði að líklega yrði leitað til Íslenskrar erfðagreiningar um að veita þarna liðsinni þangað til tækjakostur veirufræðideildar hefði verið uppfærður nægilega mikið til að hún anni þessi. Ef Íslensk erfðagreining komi inn í verkefnið verði afkastagetan örugglega nægileg.
Svandís segir að enn liggi ekki fyrir ákvörðun um hvort ríkið eða ferðamenn beri kostnaðinn af sýnatökunni en talið er að hann verði um 27.000 krónur á sýni.