Rannsókn kynferðisbrotamáls á frístundaheimili í Hraunvallaskóla í Hafnarfirði miðar vel samkvæmt tilkynningu frá lögreglu. Kemur þar fram að skýrsla hefur verið tekin af börnunum tveimur sem maðurinn er sakaður um að hafa brotið gegn, í Barnahúsi. Tilkynningin er eftirfarandi:
„Lögreglan á höfuðborgarsvæðinu hefur til rannsóknar meint kynferðisbrot karlmanns á þrítugsaldri gegn tveimur börnum í Hafnarfirði. Maðurinn var handtekinn í síðustu viku og úrskurðaður í nokkra daga gæsluvarðhald í Héraðsdómi Reykjaness, en Landsréttur felldi síðan úrskurðinn úr gildi. Húsleit var framkvæmd á heimili mannsins og lagt hefur verið hald á gögn í þágu málsins. Skýrslutökur vegna barnanna fóru fram í Barnahúsi.
Rannsókn málsins miðar vel.“