Ekki liggur enn fyrir hvernig flugi til og frá landinu verður háttað eftir að landamærin verða opnuð þann 15. júní næstkomandi. Birna Ósk Einarsdóttir, framkvæmdastjóri sölu- og þjónustusviðs Icelandair, segir að draumurinn sé að koma á daglegu flugi til nokkurra lykilstaða í Evrópu en ekki sé ljóst hversu hratt það getur gerst því ástandið sé viðkvæmt.

Morgunblaðið skýrir frá þessu í dag. Haft er eftir Birnu að Icelandair vilji fljúga sem mest en eftirspurnin verði að ráða. Selt sé í flug á vegum félagsins en þróun mála muni leiða í ljós hvert verður hægt að fljúga. Hún sagði nokkra hópa ferðamanna tilbúna til að ferðast um leið og löndin opnast en á móti megi búast við að aðrir hópar hafi ekki efni á því vegna efnahagslegra áhrifa heimsfaraldursins.

„Erfitt er að gera áætlanir í þessu ástandi. Við getum hreyft okkur hratt og munum gera það þegar við finnum að ferðavilji og áhugi er kominn úr báðum áttum á því að fljúga.“

Hún nefndi Kaupmannahöfn, Osló, Frankfurt og Berlín sem lykilstaði sem áhugi er á að hefja flug til sem fyrst eftir 15. júní. Síðan geti Amsterdam fylgt í kjölfarið. Óvissa ríkir með flug til Stokkhólms og Lundúna.