„Við ætlum að fara hringinn í kring um landið og markmiðið er að hampa sjarma og sérstöðu bæjarfélaganna,” segir Sigmundur Ernir Rúnarsson, umsjónarmaður þáttaraðarinnar Bærinn minn sem hefst á sjónvarpsstöðinni Hringbraut á morgun, þriðjudag.
Sigmundur Ernir bendir á að í garð fari ferðasumarið mikla þar sem landsmenn ferðast innanlands. „Við vinnum þættina í samvinnu við bæjarfélögin á hverjum stað. Þetta er mjög skemmtilegt verkefni að því leyti að við erum að benda áhorfendum okkar á faldar perlur í landslaginu, sögu og menningu hvers bæjar fyrir sig. Þarna er af nægu að taka og merkileg saga að baki á hverjum landsvæði.”
Í fyrsta þættinum verður Blönduós heimsótt en hver þáttur verður tileinkaður ákveðnu bæjarfélagi. „Við verjum viku á hverjum stað, tökum viðtöl við fullt af áhugaverðu fólki og fáum mikið af spennandi myndefni,” segir Sigmundur Ernir sem hlakkar mikið til að hitta fólk um land allt í sumar: „Ég brosi bara hringinn.”