Vesturbyggð rukkar inn fasteignagjöld af brunarúst, sumarbústað sem brann til kaldra kola í ágúst árið 2019. Meðfylgjandi myndir eru af brúnarústunum og kann það að koma einhverjum sérkennilega fyrir sjónir að borga þurfi fasteignagjöld af rjúkandi rústum. En í bréfi frá Vesturbyggð til eigenda segir:
„Á meðan undirstöður hússins standa og jarðrask ekki afmáð, verður byggingarstigi eignarinnar ekki breytt og reiknuð fasteignagjöld á eignina í samræmi við fasteignamat sem Þjóðskrá Íslands gefur út.
Samþykkt var á fundi matsnefndar fasteignagjalda að fella niður umhverfisgjald á eignina og verður fasteignagjaldið endurreiknað…“
Undir bréfið ritar sviðsstjóri fjármála- og stjórnsýslusviðs Vesturbyggðar, en álagning fasteignagjalda er kæranleg til yfirfasteignamatsnefndar. Það mun væntanlega koma í ljós síðar hvort yfirfasteignamatsnefnd er sammála þessu mati Vesturbyggðar en kærufrestur er þrír mánuðir.