Þingmönnum og starfsmönnum skrifstofu Alþingis voru í dag kynntar niðurstöður könnunar sem félagsvísindastofnun vann fyrir Alþingi á starfsumhverfi og vinnustaðamenningu á Alþingi. Samkvæmt Steingrími J. Sigfússyni, forseta Alþingis, eru niðurstöðurnar sláandi og kalla á sameiginlegt átak starfsmanna þingsins til að bæta stöðuna.
Við upphaf þingfundar greindi Steingrímur frá könnuninni.
„Í dag þá var Alþingismönnum og starfsmönnum skrifstofu Alþingis kynntar niðurstöður viðamikillar könnunar sem félagsvísindastofnun vann fyrir Alþingi á starfsumhverfi og vinnustaðamenningu á Alþingi með sérstakri áherslu á hluti eins og einelti, kynferðislega áreitni og kynbundna áreitni. Þátttaka eða svörun voru með ágætum og niðurstöður sem á margan hátt eru sláandi gefa fullt tilefni til að fylgja þeim eftir af festu og bæta stöðu mála.
Undir því verki verða allir að leggja hönd á plóg, jafnt þingmenn sem starfsmenn, þingflokkar, fastanefndir og aðrir sem geta lagt sitt lið með það að markmið að bæta starfsumhverfi og vinnustaðamenningu á Alþingi og á skrifstofu þess.“
Niðurstöður könnunarinnar verða birtar á Alþingi síðar í dag eða á morgun samkvæmt upplýsingum frá skrifstofu Alþingis.