Nú hefur verið opnað fyrir umsóknir um endurgreiðslur á virðisaukaskatti vegna viðgerða, sprautunar og réttingar á fólksbifreiðum samkvæmt reikningum frá og með 1. mars á þessu ári. Þetta kemur fram á vef Ríkisskattstjóra.
Þessi réttur er fyrir hendi hjá einstaklingum vegna eigin fólksbifreiða en stendur ekki til boða þegar um atvinnubifreiðar er að ræða. Fjárhæð vinnuliðar reiknings þarf að lágmarki að nema 25 þúsund krónum án virðisaukaskatts.
Einnig er hægt að sækja um 100 prósent endurgreiðslu á virðisaukaskatti af vinnu manna við íbúðarhúsnæði og frístundahúsnæði vegna reikninga frá og með 1. mars. Þetta á sömuleiðis við reikninga vegna heimilisaðstoðar og reglulegrar umhirðu íbúðarhúsnæði svo sem garðvinnu, ræstingar sameignar og annara þrifa.
Sótt er um á þjónustusíðu umsækjenda hjá skattinum og má finna umsóknir undir flipanum „Samskipti“.
Endurgreiðslurnar eru liður í verkefninu Allir vinna, sem var hluti af aðgerðarpakka ríkisstjórnarinnar sökum Covid-19 faraldursins.
