Tvær góðar ástæður til að ferðast til Íslands frá og með 15. júní eru þær að svo vel hefur tekist til í baráttu við kórónuveiruna að landið er orðið nánast smitfrítt, og að krónan hefur lækkað mikið í efnahagsþrengingunum sem núna herja á samfélagið.
Þetta kemur fram í grein á ferðavefnum Hit Iceland sem leiðsögumaðurinn og ljósmyndarinn Einar Páll Svavarsson heldur úti. Vefurinn geymir miklar upplýsingar á ensku um ferðir á Íslandi.
„COVID-19 ástandið á Íslandi er miklu betra en í mörgum öðrum löndum. Undanfarna mánuði hefur allt ferlið verið í styrkum höndum ríkisstjórnarinnar, heilbrigðisráðuneytisins og almannavarna,“ segir í upphafi greinarinnar en farið er fögrum orðum yfir aðgerðir gegn veirunni hér á landi.
Segir síðan að faraldurinn hafi haft mjög eyðileggjandi áhrif á ferðaiðnaðinn og efnahag landsins. Í forgangi sé að þróa í samvinnu við aðrar þjóðir öruggar reglur og vottorð varðandi ferðalög til landsins, sem og að ryðja úr vegi eins mörgum hömlum og mögulegt sé. „Okkur er mikið í mun að sýna fólk um allan heim fádæma fegurð náttúruundra landsins,“ segir í greininni.
Síðan segir að öllum ferðatakmörkunum til landsins verði aflétt þann 15. júní og að ókeypis skimum fyrir veirunni verði í boði á Keflavíkurflugvelli. Farið er yfir rakningarappið og fleiri aðgerðir sem lesendum eru kunnar.
Þá segir að krónan hafi lækkað um meira en 15% þannig að nú sé allt orðið miklu ódýrara á Íslandi.
Ennfremur er væntanlegum gestum til landsins bent á að hér sé heilbrigðiskerfið framúrskarandi sem komi sér vel ef svo ólíklega vilji til að þeir smitist af veirunni á ferðum sínum um landið.