Landspítalinn var í gær dæmdur í Landsrétti til að greiða manni rétt rúmlega 41 milljón króna í skaðabætur vegna heilsutjóns sem maðurinn varð fyrir við uppsetningu þvagleggs í tengslum við aðgerð sem hann gekkst undir á Landspítalanum. Héraðsdómur hafði áður sýknað Landspítalann af öllum kröfum. Þeim dómi var snúið við.
Manninum höfðu áður verið greiddar skaðabætur á grundvelli sjúkratrygginga út frá þeirri örorku sem metin er honum vegna heilsutjónsins. En sá úrskurður grundvallast ekki á því að tjóninu hafi verið valdið með saknæmum hætti.
Í Landsrétti var sönnunarbyrðinni með vissum hætti snúið við á þeim grundvelli að Landspítalinn tilkynnti ekki um atvikið fyrr en mjög seint. Af þeim sökum lagði Landsréttur þá skyldu á herðar Landspítalanum að færa sönnur á að atvikið hafi ekki borið að með saknæmum hætti og tókst Landspítalanum ekki að sanna það, að mati Landsréttar.
„Ég tel að þetta hafi verið lögfræðilega réttur dómur og er þess vegna ánægður fyrir hönd skjólstæðings míns,“ segir Guðbjarni Eggertsson, lögfræðingur mannsins, í samtali við DV. „En þetta mun ekki bæta skaðann sem hann varð fyrir þó að fjárhæðin sé há.“
Um málsatvik segir meðal annars í dómnum: „Strax eftir aðgerðina hafi hann átt erfitt með þvaglát og hafi verið ákveðið að tappa af þvagblöðru hans og setja upp þvaglegg. Honum hafi virst að hjúkrunarfræðingi þeimsem annaðist verkið hafi ekki tekist að koma þvagleggnum upp í þvagblöðruna. Hafi þvagleggurinn verið dreginn til baka og þá komið ferskt blóð úr limnum. Hafi minni þvagleggur þá verið settur upp í þvagblöðruna og þvagið þá losnað. Í sjúkraskrá segir að þvagleggur hafi blóðgast við þvagleggsísetningu.“
Er talið óumdeilt að þegar verið var að koma þvagleggnum fyrir hafi myndast sár í vef frá þvagrás. Af því hafi hlotist mikið heilsufarstjón.
