Þetta kemur fram í Morgunblaðinu í dag. Haft er eftir Helga Grímssyni, sviðsstjóra skóla- og frístundasviðs Reykjavíkurborgar, að staða þessara barna sé mikið áhyggjuefni. Einnig berist fréttir af því að foreldrar þeirra hafi lokað sig af og segi að ef þeir veikist hafi þeir ekkert bakland hér á landi.
Skólastjórnendur hafa lýst yfir miklum áhyggjum af þessu í samtölum við Morgunblaðið. Haft er eftir Helga að sérstakur hópur verði settur á laggirnar til að fylgjast með þessum hópi. Ljóst sé að ástandið breytist ekki á næstunni og því verði skólahald með takmörkunum eftir páska.
„Það skiptir gríðarlega miklu máli að halda góðum tengslum og vita hvað þau eru að gera svo fólk heltist ekki úr lestinni.“
Er haft eftir Helga.
Sabine Leskopf, formaður fjölmenningarráðs Reykjavíkurborgar, sagði í samtali við Morgunblaðið að hljóðið í innflytjendum sé „allt öðruvísi“ en í Íslendingum.
„Þessir foreldrar senda börn sín síður í skólann, hafa miklar áhyggjur og vilja frekar hafa börnin heima. Frá sínum heimalöndum fá þau fréttir af lokuðum skólum og krefjast þess einnig hér til að vernda börnin. Annað atriði sem kann að skýra þetta er mikil áhersla innflytjenda á börnin. Íslenskt samfélag leggur skiljanlega áherslu á þá sem eldri eru, en eldri ættingjar innflytjenda eru aftur á móti ekki hér.“
Er haft eftir henni. Hún benti einnig á að vantraust í garð kerfisins vera frekar ríkjandi meðal innflytjenda og það geti haft áhrif á ákvarðanir þeirra um að halda börnunum heima.