Víðir Reynisson, yfirlögregluþjónn hjá ríkislögreglustjóra, segir að ekki standi til að setja ferðabönn um páskanna en engu að síður sé biðlað til almennings að halda sig heima og ferðast frekar innanhúss eins og slagorðið er orðið um þessar mundir.  Þetta kom fram á upplýsingafundi almannavarnadeildar ríkislögreglustjóra rétt í þessu.

Þeir útleigjendur orlofshúsa sem hafa haft samband við Víði hafa fengið þau svör að hann ráðleggi þeim að afturkalla úthlutanir yfir hátíðirnar. Þarna undir falla aðilar eins og stéttarfélög sem bjóða orlofshús og íbúðir til leigu yfir páskahátíðina.

Þórólfur Guðnason, sóttvarnarlæknir, bendir á að þó almenningur á landinu fái frí yfir páskana þá tekur kórónaveiran sér ekkert slíkt.

„Veiran mun ekki virða frídaga og hún mun ekki virða páska“