Mál vegna andláts 42 i ára konu, sem lést tæplega hálfum sólarhring eftir útskrift af bráðamóttöku Landspítalans í Fossvogi í síðustu viku, hefur verið vísað til Landlæknis og er nú til rannsóknar á Landspítalanum. Þetta kemur fram á Vísi.
Vísir hefur það eftir heimildum að konan hafi verið flutt á bráðamóttöku um kvöldmatarleytið á fimmtudag. Hafði hún þá ekki stjórn á höndum, gat ekki stigið í fætur og var illa áttuð. Grunur lék á að hún væri með blóðsýkingu. Hún var útskrifuð aðeins þremur tímum síðar. Var henni ekið í hjólastól út í bifreið og send heim á leið. Samkvæmt Vísi var ástand hennar þá engu betra en við komuna á sjúkrahúsið.
Tólf tímum síðar var hún látin.
„Ég vil byrja á því að senda aðstandendum konunnar samúðarkveðjur. Við höfum vísað þessu máli til Landlæknis og erum að rannsaka atvikið innanhúss en ég get ekki tjáð mig meira um þetta atvik af svo stöddu,“ hefur Vísir eftir Páli Matthíassyni, forstjóra Landspítalans. Hann viðurkennir að álag á spítalanum sé vissulega búið að vera mikið en það þurfi þó ekki að hafa haft áhrif á mál konunnar. Þá þurfi rannsókn að leiða í ljós hvort um mistök var að ræða eða ekki.