Kópavogsbær er grunaður um alvarlegt verkfallsbrot. Félagi í Eflingu sem vinnur við ræstingar mætti til starfa í miðju verkfalli og þreif bæjarstjórnarsalinn fyrir bæjarstjórnarfund. Fréttablaðið greinir frá þessu.
Yfirhúsvörður hjá Kópavogsbæ segir í samtali við Fréttablaðið að um misskilning hafi verið að ræða:
„Þetta er tómur misskilningur og má kenna tungumálaörðugleikum þar um. Konan hélt að verkfallið væri búið, það myndi enda klukkan 12 á hádegi. Þegar mér var sagt að hún væri í salnum fór ég þangað og sagði henni að verkfallið endaði á miðnætti. Hún vildi bara vinna, þetta er svo duglegt fólk þessar elskur.“
Samkvæmt Fréttablaðinu uppgötvaði bæjarstjórnarfulltrúi Pírata, Sigurbjörg Erla Egilsdóttir, brotið þar sem hún mætti snemma á fundinn.
