Vandamálið varðandi skort á sýnatökupinnum sem hefur undanfarið leitt til fækkunar á sýnistökum fyrir COVID-19 er nú leyst í bili. Fannst óvænt lager með 6.000 sýnatökupinnum en fyrir voru til 3.000 pinnar. Pinnastaðan í dag er því um 9.000. Kemur þetta fram í frétt RÚV.
Þá var ranghermt í gær að 20.000 sýnatökupinnar sem stoðtækjaframleiðandinn Össur á til hefðu ekki staðist gæðakröfur. Enn er verið að prófa þá en niðurstöður liggja ekki fyrir. Ef þeir pinnar reynast nothæfir batnar staðan mikið en auk þess er unnið að því hörðum höndum að útvega nægilega góða pinna erlendis frá.