„Fram undan er krappur dans í rekstri fyrirtækja. Víða hafa tekjurnar þurrkast upp, en gjöldin ekki. Þegar líður að mánaðamótum hrannast upp gjalddagarnir, laun, húsaleiga, greiðslur fyrir aðföng og aðkeypta þjónustu. Ekki þarf að útlista að keðjuverkun hefst fljótt ef greiðslufall verður meðal fyrirtækja,“ segir Jón Þórisson, ritstjóri Fréttablaðsins, í leiðara blaðsins í dag, en þar ræðir hann um efnahagsaðgerðir ríkisstjórnarinnar gegn COVID-19 veirunnar og veltir upp hvort þær aðgerðir geti forðað fyrirtækjum frá greiðsluþroti á næstu mánuðum. Jón segir að bregðast þurfi hratt við áður en allt hleypur í hnút:

„Nokkrum aðgerðum ríkisstjórnarinnar er beint að þessari stöðu. Frestur á skilum staðgreiðslu sem fyrirtækin halda eftir af launum starfsmanna og frestur á greiðslu tryggingagjalds eru dæmi um það. Ekki virðast hugmyndir sem voru á sveimi fyrir helgina, um frest skila á innheimtum virðisaukaskatti, hafa fengið hljómgrunn, sem hefði í þessari stöðu verið til mikilla bóta. Það mun reynast mörgum fyrirtækjum í fjölda atvinnugreina erfitt að greiða laun um næstu mánaðamót. Hlutabætur, þar sem starfshlutfall er fært niður, kemur þar ekki að gagni, þar sem fólk á kröfu á launum fyrir þegar veitt vinnuframlag. Um nýtt starfshlutfall gildir annað, en gildir þá fyrir aprílmánuð trúlega. Það er því aðsteðjandi bráðavandi.“

Eiginfjárkröfur til banka hafa verið lækkaðar svo þeir geti veitt hærri lán til heimila og lífvænlegra fyrirtækja. Það er bankanna að meta hvaða fyrirtæki eru lífvænleg en Jón bendir á að það sé flókið og tímafrekt verkefni en nú megi engan tíma missa við að hjálpa fyrirtækjunum. Jón segir enn fremur:

„Mikilvægast af þessu öllu er að við úrlausnina verði gætt jafnræðis þannig að sama lausn sé boðin fyrirtækjum í sambærilegri stöðu.

Það er því langur vegur frá því að menn geti varpað
öndinni léttar, þó öll él stytti upp um síðir.

Meðölin verða að virka og mega ekki vera skaðlegri en meinið sem þau eru gefin við.“