„Allir landsmenn, sem koma nú til landsins, skulu í sóttkví. En ferðamenn ekki þar sem þeir eru ekki taldir vera í eins mikilli snertingu við fólk. Með fullri virðingu fyrir öllu því góða fólki sem nú reynir og gerir sitt allra besta í baráttunni gegn veirunni finnst mér þetta undarleg rök,“ segir Ragnar Þór Ingólfsson, formaður VR, í nýlegum Facebook-pistli. Sóttvarnalæknir hefur bent á að faraldursfræðileg rök styðji það ekki að setja erlenda ferðamenn í sóttkví þar sem þeir séu í miklu minni snertingu við viðkvæma hópa en innfæddir. Ragnar Þór bendir hins vegar á að margir félagsmenn VR séu í mikilli snertingu við ferðamenn:
„Margir félagsmenn VR og annara stéttarfélaga eru í mikilli snertingu við ferðamenn svo sem afgreiðslufólk í verslunum og starfsfólk á hótelum svo eitthvað sé nefnt. Tala nú ekki um heilbrigðisstarfsfólk en varla er liðinn sólarhringur frá því að nánast allt heilbrigisstarfsfólk á Húsavík er óvinnufært og farið í sóttkví vegna ferðamanns sem var smitaður.“
Ragnar telur að erlendir ferðamenn séu meira í snertingu við fólk en innfæddir sem flestir hangi heima hjá sér þessa dagana. Hann hrósar síðan félagsmönnum sínum:
„Ég gæti trúað að ferðamenn séu einmitt í meiri snertingu við fólk heldur en téðir landsmenn sem flestir halda sér meira og minna heima ef þeir eru ekki nú þegar í sóttkví og eru ekki í samneyti við aðra að nauðsynjalausu.
En mikið getum við þakkað öllu því flotta starfsfólki sem stendur vaktina í framlínu stórmarkaða og í verslun og þjónustu ásamt öllum þeim sem nú sinna heilbrigðisþjónustu eða öðrum framlínustörfum í okkar samfélagi og halda hlutunum raunverulega gangandi.“