Maðurinn sem hefur greinst með kórónaveiruna hafði mætt í vinnu í tvo og hálfan dag áður en hann greindist. Þetta kemur fram í frétt Vísis þar sem segir að 18 samstarfsmenn mannsins séu nú í sóttkví.

Maðurinn vinnur á um tuttugu manna vinnustað og gagnrýndi stjórnandi staðarins viðbrögð yfirvalda í samtali við fréttastofu Vísis.

Starfsmenn hafi fengið fréttir um að samstarfsfélagi þeirra væri smitaður um tvö leytið og í kjölfarið hafi það reynst þeim erfitt að fá upplýsingar. Þeim tókst loks að hafa samband við starfsmann landlæknis með krókaleiðum um hálf sex. Þá loks komu viðbragðsaðilar og tóku sýni úr samstarfsfólkinu. Stjórnandanum blöskraði að ekki hafi verið haft samband við vinnustaðinn að fyrra bragði eftir að smitið var staðfest.

Víðir Reynisson, yfirlögregluþjónn hjá ríkislögreglustjóra segir gagnrýnina réttmæta og viðbragðsaðilar hefðu átt að bregðast hraðar við.