„Ég kalla þetta hamfarablæti sem ríkir núna í fjölmiðlum. Þar eru blásin upp öll þessi ótíðindi,“ segir Óttar Guðmundsson geðlæknir í viðtali í Morgunblaðinu í dag.

Það hefur væntanlega ekki farið fram hjá neinum sem fylgist með fjölmiðlum að neikvæðar fréttir hafa dunið á landsmönnum: Verkföll, slys, jarðskjálftar, hugsanleg eldgos, snjóflóð, kórónaveiran, loðnubrestur og óveður hafa verið nokkuð fyrirferðarmikil í umræðunni – sérstaklega eftir áramót.

Óttar segist skynja aukinn kvíða meðal skjólstæðinga sinna, fréttir sem þessar hafi nefnilega áhrif á fólk. Sjálfur telur Óttar ekkert tilefni vera til að óttast sérstaklega.

„Það hafa alltaf verið vond veður á Íslandi og við höfum upplifað verkföll, jarðskjálftavá og eldgos áður. Þetta tekur allt saman enda, þannig verður á endanum samið í þessum verkföllum og veiran virðist til dæmis ekki vera neitt í líkingu við spænsku veikina. Það er ekkert sem bendir til þess að það verði eldgos í Grindavík, þannig að við ættum aðeins að reyna að horfa raunsæjum augum á allar þessar hamfarafréttir,“ segir Óttar við Morgunblaðið.

Hann segir að þessar fréttir, hver ofan í aðra, valdi kvíða hjá fólki og læknar þurfi í auknum mæli að gefa róandi lyf. Hann segir að frásagnir um kórónuveiruna sé orðnar eins og íþróttakeppni. „Hversu margir hafa veikst og hve margir dáið. Þetta er fyrsta frétt í öllum fréttatímum,“ segir hann.