Eldur kom upp í bifreið í Árbænum á sjötta tímanum í gærkvöldi. Slökkvilið var kallað á vettvang og var eldurinn slökktur. Í skeyti frá lögreglu er haft eftir eiganda bifreiðarinnar að hann hafi verið nýbúinn að kaupa hana þegar eldurinn kom upp. Bifreiðin var flutt af vettvangi með kranabíl en ekki kemur fram í skeyti lögreglu hversu miklar skemmdir urðu á henni.

Lögreglan hafði í mörg horn að líta í gærkvöldi og í nótt. Á tólfta tímanum í gærkvöldi var maður handtekinn vegna gruns um stuld á bifreið, skjalafals og vörslu fíkniefna. Maðurinn fékk pláss í fangageymslu lögreglu. Um hálf níu leytið var tilkynnt um ökumann í annarlegu ástandi á Sæbraut. Bifreiðin var stöðvuð á Vesturlandsvegi skömmu síðar en ökumaðurinn er grunaður um akstur undir áhrifum fíkniefna.

Þá hafði lögregla afskipti af konu í Hafnarfirði á tólfta tímanum í gærkvöldi. Konan var í annarlegu ástandi og var hún handtekin sökum ástands síns. Ætluð fíkniefni fundust á konunni við vistun. Á öðrum tímanum í nótt var tilkynnt um umferðaróhapp og afstungu í Hafnarfirði. Þarna hafði bifreið verið ekið á aðra kyrrstæða bifreið og í kjölfarið af vettvangi. Lögregla hafði hendur í hári ökumannsins skömmu síðar.

Þessu til viðbótar voru nokkir stöðvaðir réttindalausir í umferðinni auk þess sem ölvunarakstur og akstur undir áhrifum fíkniefna komu við sögu.