Hrottafengin árás á fjórtán ára dreng við biðstöð Stræót í Hamraborg í Kópavogi, sem greint var frá í síðustu viku, var tekin til umræðu á fundi bæjarráðs Kópavogs í morgun.
Fulltrúar lögreglunnar á höfuðborgarsvæðinu mættu á fundinn og ræddu verklag þeirra þegar upp koma mál sem varða ofbeldi og mismunun meðal ungmenna.
Sigurbjörg Erla Egilsdóttir, bæjarfulltrúi Pírata, gerði málið að umfjöllunarefni sínu í bæjarstjórn Kópavogs á þriðjudag og lagði áherslu á þá skyldu sem Barnasáttmáli Sameinuðu þjóðanna, sem Kópavogsbær vinnur nú að því að innleiða, leggur á stjórnvöld að hafa virkar ráðstafanir til að greina og bregðast við tilfellum þar sem barn hefur sætt illri meðferð.
Í framhaldinu óskaði Sigurbjörg eftir umræðu í bæjarráði um viðbrögð Kópavogsbæjar vegna málsins og bar þar upp tillögu þess efnis að Kópavogsbær hefji átak gegn einelti og ofbeldi ungmenna.
Málið var sem fyrr segir tekið fyrir í morgun og samþykkti bæjarráð að Kópavogsbær myndi hefja samræður við önnur sveitarfélög á höfuðborgarsvæðinu um samstíga aðgerðir vegna ofbeldis meðal unglinga. Sviðsstjóra menntasviðs var falið að hafa samband við forstöðumann þjónustumiðstöðvar Breiðholts, sem þegar hefur haldið samráðsfund með fulltrúum innan Reykjavíkurborgar um ofbeldi meðal unglinga.