Sverrir Hreiðarsson, stjórnarmaður í Samtökum fjártæknifyrirtækja og framkvæmdastjóri Aurs, telur að lagabreyting sem gerð hefur verið í því skyni að stemma stigu við smálánastarfsemi muni í reynd bitna á heiðarlegri lánastarfsemi og jafnvel ýta fremur undir að fólk taki smálán. Sverrir fer yfir þetta í grein í Morgunblaðinu í dag. Hann segir:
„Sú breyting sem kemur verst niður á fjártæknifyrirtækjum er sú óskiljanlega ákvörðun að færa hámarksviðmið árlegrar hlutfallstölu kostnaðar (ÁHK) úr 50% í 35% og halda þingmenn að það sé ígildi þess að verið sé að lækka vexti eða lántökukostnað. Það er öðru nær. Það eina sem gerist með því er að neytendur teygja lán sín til lengri tíma og borga þar af leiðandi meiri kostnað í formi fleiri seðilgjalda og vaxta fyrir lengra tímabil. Hliðarverkun af aðgerðum stjórnmálamannanna verður líklega sú að fleiri freistast til að taka ólögleg smálán – því þau virðast ódýrari við fyrstu sýn.“
Sverrir segir að þessi breyting á árlegri hlutfallstölu kostnaðar hafai verið gerð án nokkurrar skoðunar eða rannsóknar á raunverulegum áhrifum hennar á neytendur og lánveitendur. Hann segir ljóst að ríkið, eigandi ríkisbankanna, ætli ekki að bakka með þessa afdrifaríku breytingu.
Sverrir sendir þessa sneið til yfirvalda í lok greinar sinnar:
„Samtök fjártæknifyrirtækja fagna vissulega yfirlýstri áherslu ráðherra og stjórnvalda á nýsköpun í landinu en frábiðja sér að vera, á tyllidögum, talin til þeirra sem njóta góðs af þeirri
stefnu – enda annað sýnt hér í verki.“