Ætla mætti að Aron Snær Sigurðsson hafi ætlað að halda gott partý fyrir tveimur árum þegar hann fór í marga skrautlega þjófnaðarleiðangra í Reykjavík. Aron var í dag sakfelldur í Héraðsdómi Reykjavíkur fyrir mörg þjófnaðarbrot.
Í fyrsta lagið er honum gefið að sök að hafa brotist inn í Nettó í Mjóddinni og stolið tveimur pakkningum af frosnum humri og hálfum lítra af rjóma.
Þvínæst stal hann þremur pakkningum af lambakjöti úr Bónus í Hraunbæ.
Það er ekki ónýtt að hlýða á fagra tóna þegar fólk snæðir kræsingar á borð við humar og lambakjöt. Óvíst er þó hvort sú hugsun réði því að Aron braust inn í hjóðfæraverslunina Gítarinn, Stórhöfða 27 í Reykjavík, með því að brjóta rúðu með steini í anddyri verslunarinnar, og stal þaðan gítar af gerðinni Tanglewood. Sérkennilegt er að Aron framdi nákvæmlega eins afbrot nokkrum mánuðum síðar, stal öðrum Tanglewood gítar úr sömu verslun.
Næsta ránsferð Arons var í Hagkaup í Kringlunni en þar stal hann ilmvatnsglasi. Rakspíra stal hann síðan úr Hagkaup í Skeifunni.
Aron játaði brot sín skýlaust fyrir dómi.
Hinn dæmdi er á 32. aldursári og á hann nokkurn sakaferil að baki sem nær allt aftur til ársins 2008.
Aron var dæmdur í fjögurra mánaða fangelsi og er refsingin ekki skilorðsbundin þar sem hann hefur brotið af sér áður með svipuðum hætti og fengið skilorðsbundna dóma. Þá var hann dæmdur til að greiða verjanda sínum rúmlega 80.000 krónur í málsvarnarlaun.