Fyrsta tilfelli kórónaveirunnar á suðurhluta Ítalíu hefur nú verið staðfest, en um er að ræða konu frá norðurhluta Ítalíu sem var í ferðalagi á Sikiley ásamt eiginmanni og vinum.
Í fréttum ítalskra fjölmiðla kemur fram að konan sé búsett í Bergamo í Lombardy-héraði, skammt norðaustur af Mílanó. Konan er sögð hafa verið með flensulík einkenni síðustu daga. Þegar hún leitaði til læknis fékkst grunur um kórónaveiruna staðfestur.
Konan dvaldi á Mercure-hótelinu og hafa gestir þess nú verið settir í sóttkví. Íbúar í Palermo, stærstu borg Sikileyjar, brugðust við þessum fréttum með því að hamstra mat úr verslunum. Óttast íbúar að gripið verði til lokana.
Í dag hafa ítölsk yfirvöld staðfest 54 ný tilfelli kórónaveirunnar og er fjöldi smitaðra nú kominn upp í 283. Sjö hafa látist og einn að minnsta kosti hefur náð sér að fullu. Þá staðfestu yfirvöld í Austurríki og Króatíu að veiran hefði greinst þar í morgun.