Vísir greindi frá þessu í hádeginu en nú hefur myndband af viðbúnaði lögreglu við handtökuna vakið athygli á íslenska svæðinu á samfélagsmiðlinum Reddit. „5 löggubílar, 11 löggur,“ stendur í myndbandinu sem sýnir mikinn fjölda af löggum á bílastæðinu. Í frétt Vísis segir að maðurinn neitaði að verða við tilmælum lögreglu og því hafi maðurinn uppskorið barning frá þeim. Þá var hann tekinn niður í jörðina og lögreglukonurnar tvær sem héldu honum þar óskuðu eftir frekari aðstoð, sem barst skömmu síðar.
Í athugasemdum við myndbandið veltir notandi nokkur því fyrir sér hvers vegna viðbúnaðurinn sé svo mikill. „Getur einhver sem eitthvað veit varðandi löggu mál sagt mér hvers vegna það koma 11 löggur/5 bílar á staðinn? Hvernig hljómar „back-up“ kallið í svona málum? „Við erum tvær hérna að reyna handtaka einn strák, óskum eftir aðstoð“ „Móttekið, sendum 4 bíla á þig!“ Ég skil ekki neitt, eins og í Bandaríkjunum, maður sér þetta oft þar, 20 bílar á móti einum gæja sem stafar engin ógn af. Hvernig gerist þetta, og afhverju?“
Þóra Jónasdóttir aðstoðaryfirlögregluþjónn sagði í samtali við Vísi að maðurinn hafi verið grunaður um að aka undir áhrifum. Þá hafi hann verið árásargjarn við handtökuna og þess vegna var óskað eftir aðstoð. Hún segir að viðbúnaður lögreglu hafi litið út fyrir að vera mikill vegna þessa en maðurinn er ekki grunaður um frekari brot en akstur undir áhrifum.
Myndbandið af viðbúnaði lögreglu má sjá hér fyrir neðan:
Bara í Breiðholti from Iceland