Lögreglustjórinn á Suðurnesjum hefur gefið út ákæru á hendur rúmlega fertugum karlmanni fyrir ofsaakstur og akstur undir áhrifum fíkniefna. Ákæran er birt í Lögbirtingablaðinu.
Í henni kemur fram að lögregla hafi mælt bifreið mannsins, sem er af gerðinni BMW 5 530E, á Reykjanesbraut, skammt frá Grindavíkurvegi, á 192 kílómetra hraða. Leyfður hámarkshraði þarna er 90 kílómetrar á klukkustund.
Þá kemur fram í ákæru að ökumaðurinn hafi verið undir áhrifum fíkniefna. Í blóði hans mældist meðal annars amfetamín. Ákæruvaldið gerir þær kröfur að maðurinn verði dæmdur til refsingar og til greiðslu alls sakarkostnaðar. Þá verði honum gert að sæta sviptingu ökuréttar.