Bandarískur maður hefur setið í gæsluvarðhaldi hér á landi í tæpar þrjár vikur, grunaður um mörg kynferðisbrot gegn ungum drengjum, bæði hér á Íslandi og erlendis. Maðurinn er ekki búsettur hér á landi. RÚV greinir frá.
Maðurinn var handtekinn 31. janúar og úrskurðaður í gæsluvarðhald daginn eftir. Maðurinn er á fertugsaldri. Hann er grunaður umað hafa tælt unga drengi með skilaboðum á samfélagsmiðlum og látið þá senda af sér myndir. Er hann talinn hafa stundað þetta athæfi í nokkur ár. Slíkt athæfi er oft undanfari þess að börn eru neydd út í kynferðislegar athafnir. Ekki kemur hins vegar fram í frétt RÚV um nákvæmlega hvernig kynferðisbrot maðurinn er grunaður um.
Lögreglan á Suðurnesjum fer með rannsókn málsins og nær hún út fyrir landsteinana.
