„Við skynjum mikinn meðbyr og stuðning. Við skynjum það líka að þessi umræða um vinnu fólks og mat á störfum er að opnast.“
Hefur Fréttablaðið eftir Viðari Þorsteinssyni, framkvæmdastjóra Eflingar, í umfjöllun um verkfallið. Hann sagði jafnframt að það hafi verið áhugavert að hlusta á umræðuþætti helgarinnar því fólk sé nú byrjað að nálgast umræðuna á annan hátt.
„Það er bara bein afleiðing af þessari baráttu okkar. Þótt við eigum auðvitað eftir að sjá hverju hún skilar þá held ég að við höfum galopnað þessa umræðu.“
Er haft eftir honum.
Áhrifa verkfallsins mun gæta einna mest á leikskólum borgarinnar. Auk þess skerðist matarþjónusta í grunnskólum og á annað þúsund notendur velferðarþjónustu verða fyrir áhrifum af verkfallinu. Hreinsunarstörfum innan borgarlandsins verður ekki sinnt.