Lægðin sem gekk yfir Atlantshafið um helgina varð ekki dýpsta lægð sögunnar eins og spár höfðu jafnvel gefið til kynna að yrði raunin.
Fjallað er um þetta á veðurvefnum Blika.is.
Þar segir að spár hafi gert ráð fyrir að þrýstingur í miðju lægðarinnar yrði 916 til 918 hPa. Það er ekki langt frá metinu sem er um 912 til 913 hPa.
Á greiningarkorti breskur veðurstofunnar, sem Blika vitnar til, varð lægðin dýpst 922 hPA.
„Greiningakortið er þó bara gert á 6 tíma fresti og líklega hefur hún orðið eitthvað dýpri en það. Það er þó ekkert sem bendir til þess að lægðin hafi náð nálægt 913 hPa metinu á milli athugunartíma. Eftir stendur þó að áratugir eru síðan svo djúp lægð hefur sést,“ segir í fréttinni en þar er jafnframt fjallað um áhrif lægðarinnar hér á landi.