Rétt fyrir klukkan 22 í gærkvöldi hugðist lögregla stöðva för ökumanns í Seljahverfi í Breiðholti. Ökumaðurinn sinnti ekki stöðvunarmerkjum og var bifreiðinni meðal annars ekið yfir gatnamót gegn rauðu ljósi.

Ekki nóg með það heldur var bifreiðinni einnig ekið eftir göngustíg og endaði ökuferðin á tré við íbúðarhús í hverfinu. Ökumaður og farþegi í bílnum náðu að hlaupa burt og flýja þannig undan lögreglu. Í skeyti lögreglu um verkefni gærkvöldsins og næturinnar kemur fram að bifreiðin hafi verið fjarlægð af vettvangi með dráttarbifreið. Málið er í rannsókn.

Þá var tilkynnt um tvö innbrot í bifreiðar í gærkvöldi, annað þeirra varð í Breiðholti þar sem hljómflutningstækjum var stolið. Hitt var í miðborg Reykjavíkur þar sem einhver verðmæti voru tekin.

Loks hafði lögregla afskipti af manni á veitingahúsi í miðborginni vegna fjársvika. Tilkynning um málið barst lögreglu klukkan 23:36 en maðurinn hafði fengið afgreiddar veitingar sem hann gat ekki greitt fyrir.