„Barnið sem nú á að vísa frá Íslandi hefur upplifað öryggi í sínu nærumhverfi hér. Það getur ekki gengið að slíku öryggi í flóttamannabúðum í Portúgal og enn síður í heimalandi sínu, Íran,“ segir í yfirlýsingu kennara í Hlíðaskóla sem þeir beina til Áslaugar Örnu Sigurbjörnsdóttur, dómsmálaráðherra, vegna yfirvofandi brottvísunar fjölskyldu frá Íran sem senda á héðan til Portúgal á mánudag. Fjölskyldan telur að í flóttamannabúðum í Portúgal munu útsendarar íranskra yfirvalda hafa hendur í hári þeirra. Fjölskyldan hefur orðið fyrir ofsóknum í Íran vegna andlegrar iðkunar föðurins. Sonur hjónanna, Maní, er transbarn, og kennararnir láta sig einkum varða velferð hans í yfirlýsingu sinni.
Öryggi Maní er á okkar ábyrgð
Ályktun frá kennurum í Hlíðaskóla, skóla sem er leiðandi í málefnum hinsegin barna:
17 ára barn sem kom með foreldrum sínum til landsins bíður þess að vera sent til baka til Portúgal, en þaðan má búast við að fjölskyldan verði send til Íran. Í þriðju grein Barnasáttmála Sameinuðu þjóðanna er kveðið á um að þegar gerðar séu ráðstafanir, sem varði börn, skuli ávallt það hafa forgang sem barni er fyrir bestu. Barnið sem nú á að senda burt frá Íslandi er trans drengur. Í Hlíðaskóla höfum við undanfarin ár lagt okkur fram við að gera skólaumhverfið að góðum stað fyrir öll börn. Trans börn eru í meiri hættu en önnur börn þegar kemur að félagslegri einangrun og ofbeldi.
Öryggi barna í samfélaginu varðar okkur öll og því er það skylda okkar að veita þessum dreng skjól. Í frásögnum fjölmiðla höfum við getað lesið að foreldrar sjá jafnvel ástæðu til þess að flytja frá einu byggðalagi til annars til þess að trans barn njóti öryggis í nærumhverfi sínu. Barnið sem nú á að vísa frá Íslandi hefur upplifað öryggi í sínu nærumhverfi hér. Það getur ekki gengið að slíku öryggi í flóttamannabúðum í Portúgal og enn síður í heimalandi sínu, Íran.
Við undirrituð, kennarar í Hlíðaskóla sem sitjum í teymi er lætur sig málefni hinsegin barna varða, hvetjum stjórnvöld til þess að endurskoða ákvörðun sína um að senda trans barn, sem nú býr við öryggi í samfélagi sínu, í aðstæður þar sem það mun án efa óttast um líf sitt.
Hildur Heimisdóttir Anna Flosadóttir Hjalti B. Valþórsson Rakel Guðmundsdóttir Þórey Þórarinsdóttir
Vakin skal athygli á því að ítarlegt viðtal við fjölskyldunar birtir á vef Fréttablaðsins í gærkvöld.
