Aðgerðarstjórn höfuðborgarsvæðisins var virkjuð klukkan fimm í morgun og hafa helstu verkefnin verið á Kjalarnesi og í efri byggðum vegna veðurofsans sem nú gengur yfir.

Að sögn lögreglunnar á höfuðborgarsvæðinu hafa vindhviður á Kjalarnesi farið yfir 60 metra á sekúndu á tímabili. „Við biðjum fólk um að halda sig innandyra meðan versta veðrið gengur yfir ef því verður viðkomið,“ segir á Facebook-síðu lögreglu.

Samkvæmt upplýsingum frá almannavarnardeild ríkislögreglustjóra hafa tilkynningar um fok verið að berast frá Kjalarnesi og höfuðborgarsvæðinu. Þá hafa björgunarsveitir Landsbjargar verið að störfum á Suðurlandi og í Vestmannaeyjum.

Þá hafa rafmagnsbilanir verið á nokkrum stöðum, til dæmis undir Eyjafjöllum, á Rangárvöllum, í Vík og Mýrdal, í Biskupstungum í Hvalfirði og Húsafelli. Þá er verið að ræsa varaafl í Vestmannaeyjum. Allar leiðir út frá höfuðborgarsvæðinu eru lokaðar.