Ljóst er að talsvert tjón varð í hjólhýsabyggðinni við Þórisstaði í Svínadal í óveðrinu sem gekk yfir í morgun. Rúta fauk meðal annars á hliðina sem og nokkur hjólhýsi á svæðinu.
Jón Valgeir Pálsson, ábúandi á Þórisstöðum, segir í fréttum RÚV að hann hafi aldrei upplifað annað eins óveður. Byrjað hafi að hvessa í nótt og um fimm leytið í morgun hafi verið komið mjög vont veður. Aðspurður um mögulegt tjón segir hann erfitt að meta það. Þó sé ljóst að tjónið á bílum og hjólhýsum sé meira en af húsum á svæðinu.
Í Facebook-hópi íbúa í Svínadal má sjá talsverðar skemmdir á hjólhýsum og þá má sjá einnig rútu liggja á hliðinni. Veður á svæðinu er nú byrjað að ganga niður.