„Hef ekki í huganum alla mælingasöguna þarna, en held ég geti fullyrt með vissu að svona mikill styrkur sé afar fátíður, þó svo að þetta sé einn þekktasti hviðustaðurinn við þjóðvegi landsins,“ segir Einar Sveinbjörnsson veðurfræðingur á vef sínum Blika.is.
Þar segir Einar að vindhviða við Hafnarfjall klukkan rúmlega tíu í morgun hafi mælst 71 metri á sekúndu. Það jafngildir 256 kílómetrum á klukkustund. Einar birtir mynd máli sínu til stuðnings en á henni má sjá að vindhviður á svæðinu hafa farið í 50 til 60 metra á sekúndu í morgun.
Þá segir Einar að sunnan- og suðvestanlands byrjar veður að ganga niður um hádegi en norðanlands í eftirmiðdaginn. Íbúar á Vestfjörðum geta búist við slæmu veðri fram á kvöld. Einar segir að lokum að austanlands slotar hríðinni milli klukkan 18 og 21, um leið og hlánar á láglendi.
