Héraðssaksóknari hefur ákært konu, sem fædd er árið 1961, fyrir fjárdrátt úr dánarbúi föður síns. Verður höfðað sakamál gegn konunni á næstunni fyrir Héraðsdómi Reykjavíkur. Konan er sögð hafa dregið sér fé af bankareikningi dánarbúsins í fimm færslum á tímabilinu frá 23. október 2015 til 30. október 2015. Faðirinn lést þann 22. október 2015.
Faðirinn sat í óskiptu búi en konan tilkynnti lát hans til sýslumannsins á höfuðborgarsvæðinu þann 30. október, síðasta daginn sem hún á að hafa tekið út fé af reikningi hans. Meintur fjárdráttur nemur samtals 2,2 milljónum króna.
Færslurnar voru 500.000, 450.000, 750.000, 250.000 og 250.000 krónur.
Þess er krafist að ákærða verði dæmd til refsingar og greiðslu alls sakarkostnaðar.
Jafnframt er gerð einkaréttarkrafa fyrir hönd systkina konunnar um að hún greiði þeim tæplega tvær og hálfa milljón króna að viðbættum dráttarvöxtum frá 1. desember 2015, auk kostnaðar vegna lögmannsaðstoðar.
