Líkt og greint hefur verið frá í dag er spáð fárviðri á öllu landinu á morgun. Appelsínugul viðvörun er í gildi fyrir allt landið en rauð viðvörun er á höfuðborgarsvæðinu og öllu sunnanverðu landinu. Þetta hefur orðið til þess að fólk hópaðist út í matvöruverslanir í dag og tæmdu hillurnar.
Mbl.is greindi frá því að ástandið hefði verið verra í dag en á Þorláksmessu í matvöruverslunum. Mbl.is ræddi við Guðmund Marteinsson, framkvæmdastjóra Bónuss, enn samkvæmt honum verða verslanir Bónuss ekki opnaðar á morgun fyrr en óveðurið hefur gengið yfir.
Hillur verslana voru farnar að tæmast á sjötta tímanum í dag. Viðskiptavinur nokkur sem ræddi við mbl.is sagðist hafa þurft að fara í nokkrar verslanir til að leita eftir brauði. „Það er brjálað að gera, það er bara staðan,“ sagði Guðmundur en allt gekk þó áfallalaust fyrir sig í dag. Miðað við myndirnar sem mbl.is birti þá er ljóst að fólk hafi verið að hamstra vegna óveðursins.
Sólrún nokkur segir á Twitter-síðu sinni að það hafi verið heimsendastemning í Krónuverslun sem hún fór í. „Hefði átt að taka með mér bók til að lesa meðan ég bíð í röðinni í Krónunni. Aldrei séð svona mikið af fólki og sumar hillur eru skuggalega tómar,“ segir Sólrún. „Sum pör hérna eru búin að taka uppá því að annað stendur í röð með kerru og barn og hitt kemur hlaupandi með vörur og það bara gengur glimrandi hjá þeim að fylla.“
Rauða viðvörunin stendur yfir á höfuðborgarsvæðinu til klukkan 11 á morgun en appelsínugul viðvörun verður í gildi eftir það og til klukkan 15:00.