Kvennaathvarfið hefur sent frá sér tölur um starfsemina árið 2018. Meðal þess sem vekur athygli er aukið ofbeldi gegn börnum í heimilisofbeldi. Hlutfall kærðra mála er lágt.
Í tilkynningu frá Kvennaathvarfinu segir:
„Árið 2019 dvöldu 144 konur og 100 börn í Kvennaathvarfinu. Konur dvöldu í athvarfinu frá einum degi uppí 236 daga, að meðaltali í 30 daga. Börn dvöldu í athvarfinu í frá einum degi upp í 155 daga, að meðaltali í 39 daga. Að meðaltali dvöldu 23 íbúar í athvarfinu á dag, 12 konur og 11 börn.
Að auki komu 294 konur í samtals 545 viðtöl án þess að til dvalar kæmi. Samtals komu því 438 konur í athvarfið í viðtöl eða dvöl á árinu. Til viðbótar hittu ráðgjafar athvarfsins 214 einstaklinga í viðtölum í Bjarkarhlíð, miðstöð fyrir þolendur ofbeldis.
Í heildina voru 67% kvenna sem komu í Kvennaathvarfið á árinu íslenskar (74% þeirra sem komu í viðtöl og 51% dvalarkvenna), 74% kvennanna eru af höfuðborgarsvæðinu. Konurnar voru á aldrinum 18-81 árs en börnin frá nokkurra daga gömlum upp í 16 ára.“
Athygli vekur einnig að andlegt ofbeldi er langalgengasta ástæðan fyrir komu í Kvennaathvarfið en líkamlegt ofbeldi er næstalgengasta ástæðan. Hér er listi fyri ástæður:
Andlegt ofbeldi 93%
Líkamlegt ofbeldi 60%
Fjárhagslegt ofbeldi 48%
Kynferðislegt ofbeldi 37%
Ofbeldi gegn börnum 35%
Morðhótanir 26%
Kyrkingatak 25%
Stafrænt ofbeldi 20%
Eltihrellir 16%
Þá segir enn fremur í tilkynningunni:
„Aldrei hafa fleiri konur nefnt ofbeldi gegn börnum sem ástæðu komu í athvarfið. Fram kemur í svörum kvennanna að alls búa 349 börn undir 18 ára að aldri á ofbeldisheimilunum sem þær koma af. Einungis 27% barnanna höfðu fengið einhverja aðstoð vegna þess ofbeldis sem barnið bjó við á heimili sínu en 44% kvennanna sögðu að barnavernd hefði verið tilkynnt um ofbeldið.“
Fimmtán prósent kvennanna höfðu kært ofbeldið til lögreglu. Af þeim málum höfðu dómar fallið í 5% málanna.
