Maður var í dag sakfelldur í Héraðsdómi Reykjaness fyrir sérstaklega hættulega líkamsárás með því að hafa þriðjudaginn 24. september 2019 ekið vörubíl hægt upp að manni og klemmt hann á milli vörubílsins og sendibíls sem þolandinn átti, með þeim afleiðingum að þolandinn hlaut mjúkpartaáverka á baki, mar á hendi og hné.

Árásin kom upp úr heiftarlegu rifrildi vörubílstjórans og sendibílsstjórans þar sem sá síðarnefndi hótaði hinum lífláti. Vörubílstjórinn hringdi í Neyðarlínuna vegna hótana sendibílstjórans og þykja upptökur af símtalinu til marks um að honum hafi staðið ógn af manninum. „Mér skilst að ég hafi hótað að drepa hann eða berja hann eða hvað sem það var,“ sagði sendibílstjórinn fyrir rétti. Var þetta tekið með í reikninginn við ákvörðun refsingar.

Vörubílstjórinn játaði brot sitt greiðlega. Hann hefur ekki gerst brotlegur við lög áður. Var hann dæmdur í fjögurra mánaða skilorðsbundið fangelsi. Hann var jafnframt dæmdur til að greiða árásarþolanum 400 þúsund krónur í miskabætur og sakarkostnað upp á rúmlega 400 þúsund krónur.