„Að halda því fram að þetta sé hættulegur staður til að vera á?! Það eru engin smit rakin í stöðvarnar, þó hann segi annað,“ sagði Björn Leifsson sem kenndur er við World Class líkamsræktarstöðina í samtali við Vísi í lok október.

Ríkislögreglustjóri hefur nú sýnt fram á að þessi fullyrðing um að engin smit séu rakin í stöðvarnar sé röng. Vísir sendi fyrirspurn varðandi málið og fram kom í skriflegu svari við fyrirspurninni að 36 bein Covid-19 smit hafi veirð rakin til líkamsræktarstöðva. Þá kom einnig fram að heildarfjöldi afleiddra smita væru 74 talsins.

Mikill fjöldi smitaðist við hnefaleikahæfingar hjá VBC í Kópavogi í október en 84 smituðust þar. Þær tölur er ekki teknar með í töluna sem ríkislögreglustjóri gaf Vísi varðandi smit í líkamsræktarstöðvum.

Mun færri smit tengjast sundlaugunum

Stefnt er á að opna sundlaugar landsins á morgun og hafa margir bent á fáránleika þess að opna sundlaugar en ekki líkamsræktarstöðvar. Miðað við upplýsingarnar frá ríkislögreglustjóra hafa þó mun færri smit komið upp í tengslum við sundlaugar. Einungis fimm bein smit eru rakin til sundlauga og eru afleidd smit tuttugu talsins.

Jóhann K. Jóhannesson, samskiptastjóri Almannavarnardeildar ríkislögreglustjóra, benti á það í skriflega svarinu til Vísis að tölurnar væru birtar með þeim fyrirvara að sjaldnast er 100% vissa um það hvar einstaklingar smitast. Hann benti einnig á að hafa þurfi í huga að ekki hefur tekist að rekja öll þau smit sem upp hafa komið hér á landi.