Víðir Reynisson, yfirlögregluþjónn almannavarnadeildar ríkislögreglustjóra, hefur verið kallaður inn á Covid-göngudeild Landspítalans. Hann greindist smitaður af kórónuveirunni í síðustu viku og hefur líðan hans farið versnandi undanfarna daga. Þetta kemur fram í frétt RÚV.
Samkvæmt Jóhanni K. Jóhannssyni, samskiptastjóra almannavarnardeildar, hóstar Víðir mikið og hefur verið flokkaður sem „gulur“ af læknum, en gulur þykir alvarlegri en grænn en ekki eins alvarlegur og rauður. Gulir sjúklingar gætu þó þurft á innlögn að halda.
„Hann var kallaður inn á deildina í morgun, þar sem honum hafði hrakað, sem sneri þá mest að lungunum og súrefnismettuninni. Nú er hann að kynnast því af eigin rauð hversu vel er haldið utan um fólk sem þarf að ganga í gegnum þessi veikindi,“ sagði Jóhann í samtali við RÚV. Víðir mun þó vera brattur miðað við aðstæður og von á því að hann fái að fara heim síðar í dag að loknum rannsóknum.
Uppfært: 15:15
Víðir Reynisson er kominn heim aftur eftir skoðun á COVID-göngudeild. Hann var með einkenni í lungum en að sögn Jóhanns K. Jóhannssonar ber hann sig vel. Göngudeild COVID-19 mun áfram fylgjast vel með honum.