Lögreglan á Suðurlandi sendi frá sér tilkynningu vegna málsins í gærkvöldi þar sem fram kemur að maður hafi látist eftir að hann festist í vatni úti í mýri. Hann kallaði sjálfur eftir aðstoð en þegar að honum var komið hafði mikið dregið af honum og missti hann meðvitund fljótlega eftir að fyrsti maður kom að honum. Endurlífgunartilraunir báru ekki árangur og var maðurinn úrskurðaður látinn við komuna á heilbrigðisstofnun Suðurlands.
Ekki liggur fyrir hver dánarorsök mannsins var en lögreglan á Suðurlandi rannsakar máli.
Á sjöunda tímanum í kvöld varð slys rétt austan við Selfoss en samkvæmt upplýsingum frá lögreglu féll maður niður um vök. Lögregla, björgunarsveitir og sjúkraflutningamenn eru enn að störfum.
Ekki er vitað hvort maðurinn sé slasaður samkvæmt upplýsingum RÚV sem komu frá yfirlögregluþjóninum Sveini Kristjáni Rúnarssyni. Þá sagði Sveinn að slysið hafi ekki veirð í Ölfusá heldur í læk eða vatni sem staðsett er austan við Selfoss.
Davíð Már Bjarnason, upplýsingafulltrúi Landsbjargar, staðfesti í samtali við Vísi að björgunarsveitirnar hefðu verið kallaðar út en hann gat þó ekki veitt frekari upplýsingar um málið.