Skömmu fyrir miðnætti var bifreið ekið á hús í Breiðholti. Ökumaður stakk af frá vettvangi en vitni var að óhappinu og gat veitt upplýsingar um skráningarnúmer bifreiðarinnar og tegund. Málið er í rannsókn.

Á ellefta tímanum í gærkvöldi stöðvuðu lögreglumenn akstur ökumanns í Vesturbænum. Ökumaðurinn steig síðan út úr bifreiðinni en gekk ekki tryggilega frá henni þannig að hún rann á lögreglubifreiðina. Hann var handtekinn, grunaður um að vera undir áhrifum áfengis og vímuefna og var hann vistaður í fangageymslu.

Skömmu fyrir miðnætti var tilkynnt um líkamsárás í Grafarvogi. Tveir menn réðust á þann þriðja og lömdu hann í höfuðið með áhaldi. Þeir létu sig síðan hverfa af vettvangi. Málið er í rannsókn.

Fjórir ökumenn voru handteknir í gærkvöldi og nótt, grunaðir um að vera undir áhrifum áfengis og/eða vímuefna.