Einn vinsælasti þáttur Rásar 2 söng sinn svanasöng í morgun. Um er að ræða útvarpsþáttinn Morgunkaffið sem var í umsjón Gísla Marteins Baldurssonar og Bjargar Magnúsdóttur.

Gísli greindi frá því á Twitter-síðu sinni í vikunni að þátturinn í dag væri sá síðasti. „Við Björg verðum með tárin í augunum að spila peppuð og óleiðinleg jólalög. Er eitthvað sem hlustendur þáttarins vilja sérstaklega heyra að skilnaði?“ skrifaði Gísli á Twitter en tístið fékk mikil viðbrögð.

Fjöldinn allur af fólki þakkaði þeim fyrir þættina og tjáði sína skoðun á endalokunum. „Sorglegt að heyra. Eins að Jón Ólafs sé bara í rauðabítið og farinn úr loftinu þegar maður skríður framúr. Ykkar verður saknað á mínu heimili,“ skrifaði skemmtikrafturinn Sólmundur Hólm til dæmis.

Tónlistarmaðurinn Jón Jónsson var heldur ekki sáttur með fréttirnar. „Skandall!!! Þið eruð frábær… Þetta verður ekki sparnaður til lengri tíma þegar allir munu glíma við eftirköstin og söknuðinn. Ekkert verður samt. Takk fyrir samfylgdina og far í friði,“ sagði Jón.

Birta Björnsdóttir, fréttamaður á RÚV, skrifaði líka athugasemd við tístið. „Æ en leiðinlegt að heyra! Það verður missir af ykkur með morgunkaffinu,“ sagði Birta

„Þetta eru bara sparnaðaraðgerðir“

Í samtali við DV segir Gísli Marteinn að þau Björg séu bæði sorgmædd yfir þessu „Við unnum þetta út frá þeirri heimspeki að ef okkur þætti gaman þá hlyti það að smitast út,“ sagði Gísli og nefndi hvað þau hefðu gaman af því að undirbúa þættina og mæta í vinnuna á laugardagsmorgnum.

„Það er búin að vera mjög góð hlustun, mér skylst að þetta sé einn vinsælasti þátturinn á Rás 2. En þetta eru bara sparnaðaraðgerðir og við lentum í niðurskurðinum, ekkert við því að segja,“ segir Gísli. „Við reyndum bara að gera lokaþáttinn skemmtilegan og upplífgandi og kvöddum bara með hlýjum kveðjum til hlustenda.“