Hráefnisskortur veldur því að bóluefni í því magni sem þörf er á mun berast seinna til landsins en áætlanir gerðu ráð fyrir. Því má búast við því að ekki verði hægt að aflétta sóttvarnatakmörkunum fyrr en um mitt næsta ár og hjarðónæmi gegn kórónuveirunni náist ekki hér fyrr en seinni hluta næsta árs.
Þetta kom fram í máli Þórólfs Guðnasonar sóttvarnalæknis á upplýsingafundi dagsins. Íslenska ríkið hefur tryggt sér kaup á 85.000 skömmtum af bóluefni frá Pfizer og stefnt er að samningum við fleiri bóluefnaframleiðendur. Um fimm þúsund skammtar koma til landsins fyrir áramót og um átta þúsund skammtar í janúar eða febrúar. Framlínustarfsfólk verður bólusett fyrst og síðan íbúar á hjúkrunar- og öldrunarheimilum.
Átta innanlandssmit greindust í gær og þar af voru sjö í sóttkví. Að mati Þórólfs eru þetta ánægjulegar tölur og segir hann faraldurinn vera í rénum. Hins vegar sé smit úti í samfélaginu og lítið þurfi út af að bregða til að gjósi upp hópsýkingar. Því sé afar mikilvægt að fara varlega áfram.