Fólk sem veikst hefur alvarlega af Covid-19 eru í aukinni áhættu á einkennum þunglyndis og áfallastreitu. Það sama á við um þá sem orðið hafa fyrir verulegri tekjuskerðingu í faraldrinum eða verið í sóttkví. Þetta kemur fram í frumniðurstöðum rannsóknarinnar Líðan þjóðarinnar á tímum Covid-19.

Rannsóknin Líðan þjóðarinnar á tímum Covid-19 er samstarfsverkefni vísindamanna við Háskóla Íslands, Embættis Landlæknis, Landspítalans og Sóttvarnalæknis. Rannsóknin hófst snemma í vor og hefur verið í gangi síðan.

Í tilkynningu frá forsvarsmönnum rannsóknarinnar segir að annar áfangi rannsóknarinnar er hafinn, og hafa allir sem tóku þátt í fyrsta áfanga hennar fengið boð um þátttöku í eftirfylgdarrannsókn. Enn er opið fyrir skráningu nýrra þátttakenda á vefsíðunni lidanicovid.is

Þar segir jafnframt að markmið rannsóknarinnar sé að „afla víðtækrar þekkingar á áhrifum faraldursins á líðan og lífsgæði landsmanna.“ Af þeim 23 þúsund manns sem skráðu sig í rannsóknina höfðu 400 manns greinst með Covid-19. Sem fyrr sagði benda fyrstu niðurstöðurnar til þess að faraldurinn hafi haft neikvæð áhrif á geðheilsu þeirra sem beinlínis hafa komist í snertingu við hann.